Прэзентацыя кнігі Л. І. Доўнар «Кніжная справа ў Мінску (канец XVIII – пачатак XX стагоддзя)»

Ларыса Іосіфаўна Доўнар, прафесар кафедры тэорыі і гісторыі інфармацыйна-дакументных камунікацый Беларускага дзяржаўнага ўніверсітэта культуры і мастацтваў (далей – БДУКМ), добра вядома кнігазнаўцам Беларусі і Усходняй Еўропы сваімі працамі па важнейшых пытаннях тэорыі і метадалогіі кнігазнаўства, гісторыі кнігі, бібліятэк і бібліяграфіі, сучаснай выдавецкай справе, апублікаванымі не толькі ў Беларусі, але і ў навуковых выданнях у Расіі, Літве, Украіне і Польшчы, на беларускай, рускай і польскай мовах. Яе навуковыя працы ахопліваюць важнейшыя пытанні кніжнай культуры ўвогуле: мінулае кніжнай культуры і яе сучаснае становішча. 
У пачатку, у рамках мерапрыемства адбудзецца “Пасвячэнне – прэзентацыя” творчасці брата Л. І. Доўнар, вядомага на Беларусі і за яе межамі літаратуразнаўцы і паэта У. І. Мархеля (1940–2013). Студэнты прачытаюць вершы Уладзіміра Іосіфавіча, з успамінамі пра яго выступяць сябры і паплечнікі. Далей сваю манаграфію прадставіць аўтар, выступяць рэцэнзенты: Кшыштаф Мігань, доктар габілітаваны кнігазнаўства, прафесар Вроцлаўскага ўніверсітэта (Польшча), Мікалай Віктаравіч Нікалаеў, доктар філалагічных навук, загадчык аддзела рэдкіх кніг Расійскай нацыянальнай бібліятэкі (Санкт-Пецярбург) і Галіна Уладзіміраўна Кірэева, загадчык навукова-даследчага аддзела кнігазнаўства Нацыянальнай бібліятэкі Беларусі.
Сваімі разважаннямі пра кнігу ў філасофска-культуралагічным аспекце падзеліцца доктар філасофскіх навук, загадчык кафедры філасофіі і метадалогіі гуманітарных навук БДУКМ Марына Аляксандраўна Мажэйка.
У склад манаграфіі Л. І. Доўнар уключаны і Каталог мінскіх выданняў, які налічвае 3133 бібліяграфічныя запісы, у тым ліку больш за 600 не ўлічаных беларускімі бібліёграфамі. Аўтар скрупулёзна выяўляла іх у фондах бібліятэк, музеяў і архіваў Беларусі, Літвы, Расіі і Польшчы. Гэта значыць, што Каталог мінскіх выданняў прадстаўляе вялікую каштоўнасць не толькі для Беларусі, але і для гэтых краін. У сувязі з чым, падчас мерапрыемства адбудзецца ўрачысты акт уручэння манаграфіі «Кніжная справа ў Мінску (канец XVIII – пачатак XX стагоддзя)» прадстаўнікам пасольстваў Расіі, Літвы і Польшчы ў Рэспубліцы Беларусь.
Творчая і прафесійная дзейнасць Л. І. Доўнар шматгранная і мае сваю гісторыю, якая знайшла адлюстраванне ў прысвечаным ёй біябібліяграфічным паказальніку, падрыхтаваным супрацоўнікамі бібліятэкі БДУКМ. Прэзентацыя паказальніка адбудзецца падчас мерапрыемства ў суправаджэнні выставы апублікаваных прац Ларысы Іосіфаўны пад назвай “Праз кніжную спадчыну – да сябе”.
Прадоўжыць мерапрыемства пасяджэнне “круглага стала” на тэму “Навуковая кнігазнаўчая школа: пераемнасць, кірункі фарміравання і ўзаемадзеяння” (а 15.20), у якім прымуць удзел кнігазнаўцы, гісторыкі, філолагі, супрацоўнікі аддзелаў рэдкіх кніг буйнейшых бібліятэк Беларусі, госці з Расіі і Польшчы. Запрашаем Вас. Кантакты: Дзем’яновіч Таццяна Аркадзьеўна, тэл. 8044–753–74–72 (Velcom)

Pres_reliz.doc